بعض دفعہ بندے کو کسی بات کی سمجھ آ جاتی ہے، اور خوشی بھی محسوس ہوتی ہے، اطمئنان بھی نصیب ہوتا ہے، لیکن وہ علم، وہ سمجھ مستقل نہیں رہتی۔ بندہ پھر اسی پہلے والی ناسمجھی اور نادانی میں مبتلا ہو جاتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہوا یہ کہ کل میری موٹر سائیکل پنکچر ہو گئی۔ پنکچر لگانے والے نے کہا، دو پنکچر ہیں۔ مجھے بڑا افسوس ہوا۔ میرے پاس پہلے ہی پیسے بہت کم تھے۔ خیر میں نے اسے ہاں دی۔
”یار دیکھ لینا کیل نکل گیا ہے“۔
اس نے خوب تسلی سے کام کیا، مجھے بڑا یقین دلایا کہ اب کم از کم یہ والے پنکچر نہیں کھلیں گے۔ میں نے دو سو روپے دیے، اور موٹر سائیکل گھر لے آیا۔
۔۔۔۔۔۔۔۔۔۔۔۔۔۔۔۔۔۔۔
میں آج زارا کو لے کر آ رہا تھا تو موٹر سائیکل پھر پنکچر ہو گئی۔ ہمیں دھوپ میں دس پندرہ منٹ چلنا پڑا۔ ایک پنکچر والے کے پاس پہنچے، چھوٹا سا بچہ تھا، اس نے بڑی محنت سے پنکچر لگائے، کل والا ایک پنکچر لیک ہو چکا تھا، اور ایک نیا تھا۔ میں نے ڈھائی سو روپے دیے، اور گھر روانہ ہو گیا۔ اس کام میں ہمیں آدھے گھنٹے سے زیادہ لگ گیا۔
گھر پہنچنے تک موٹر سائکل پھر پنکچر ہو چکی تھی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
”یار لگتا ہے ٹیوب ہی نئی ڈلوانی پڑے گی۔ گرمیوں کے دن ہیں، یہ پنکچر ہر روز کھلیں گے۔ اتنی دھوپ میں بہت مشکل ہوتا ہے موٹر سائیکل گھسیٹ کر پنکچر والے تک پہنچنا“ میں نے حسن سے مشورہ لیا۔
چار و ناچار ہم ایک پنکچر والے کے پاس پہنچے۔ اس نے ٹائر کھول کر کہا، کہ ٹائر پھٹڑ ہو چکا ہے، اگر تبدیل نہ کروایا، تو بہت رسکی ہو گا۔ کسی وقت بھی پنکچر ہو سکتا ہے۔
”دراصل ٹائر چٹکی کاٹنے لگا ہے۔ وہ کسی بھی ٹیوب کو نہیں چھوڑے گا۔ آپ ٹائر بدلوا لیں“ اس نے بات ختم کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میرے پاس پہلے ہی پیسے نہیں تھے۔ میں ٹائر کا سن کا اور بھی پریشان ہو گیا۔ پہلے تو میں نے کہا ٹیوب ہی بدل دو، لیکن بعد میں مجھے اس کی بات ٹھیک لگی، یہ ٹائر دو لاکھ کلو میٹر چل چکا تھا، گھس ہی چکا ہو گا۔
”زارا بیچاری کو کہاں تکلیف دیتا پھروں گا ہر دوسرے دن۔ بدلوا ہی لوں“۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ساڑھے چار سو پنکچروں کا، اور اب یہ ڈھائی ہزار ٹائر ٹیوب بدلوانے کا۔ تین ہزار کے خرچے نے جیسے میرا یقین ہی ختم کر دیا ہو زندگی پر سے۔
۔۔۔۔۔۔۔۔۔۔۔۔۔۔
”یار کیا کرے بندہ۔ کچھ سمجھ آتی ہے آپ کو؟“ میں نے حسن سے کہا۔
حسن خاموش رہا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجھے ایک سمجھ آئی ہے اس سارے کام میں۔
ؔ ”کیا؟“ حسن نے شکر کیا کہ خاموشی ٹوٹی ہے۔
”انا للہ و انا الیہ راجعون۔ یار ہم یہ فوتگیوں پر پڑھتے ہیں، لیکن دراصل یہ زندگی کا لائحہ عمل ہے۔ ایک مسلمان کی زندگی کا پیٹرن ہے“۔
”مجھے پتہ کیا سمجھ آئی ہے۔ یہ پیسے کسی کی جیب سے میری جیب میں آئے تھے، اور ایک بار پھر کسی اور کی جیب میں چلے گئے۔ یہ میرے نہیں تھے۔ ہمارے نفع نقصان، خوش گم، عزت بے عزتیاں، بس ایسے ہی گھوم رہے ہیں، ایک ہاتھ سے، ایک جیب سے، ایک دل سے دوسرے ہاتھ، جیب یا دل کی طرف۔ یہ کسی کے نہیں ہیں“۔
”یہ نفع نقصان میرے نہیں ہیں۔ یہ زندگی میری نہیں ہے۔ یہ سب کچھ، یہ دنیا، یہ ارد گرد، یہ میرا نہیں ہے۔ یہاں کچھ بھی میرا نہیں ہے۔ ہمارا نہیں ہے۔ یہ سب اللہ تعالیٰ کا ہے۔ یہ اسی نے بنایا ہے، اور وہی اس سب کو چلا رہا ہے۔
وہ مالک ہے، وہ ہماری زندگی جیسی چاہے چلائے، جیسی چاہے گزروائے۔ ہمارے اعتراض کی گنجائش ہی نہیں ہے کوئی۔ سب کچھ اس جیب کے پیسے کی طرح ہے۔ آج میرے پاس ہے، کل کسی اور کے پاس ہے۔
مجھے یہ سمجھ آئی ہے، کہ میں اپنی زندگی پر، اپنی تنگدستی پر، اپنی کسمپرسی پر خواہ مخواہ پریشان ہوں، خواہ مخواہ نالاں ہوں۔ شکایت کناں ہوں۔ میرا کیا حق ہے اپنی زندگی پر۔ جس نے دی ہے، وہ جیسی چاہے بس کروائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بس یہ سوچ چلتی رہی۔ حقیقت یہ ہے کہ مجھے لگا میں بہت خوش ہوں۔ میرا دل چاہا یہ سوچ میری ساری زندگی پر محیط ہو جائے، یہ کبھی نہ بھولے۔ میں بس اسی ایک سوچ پر زندگی گزار لوں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اللہ تعالیٰ ہمارے دلوں کو واقعات کی حقیقی سمجھ عطا فرمائے، آمین۔
۔۔۔۔۔۔۔۔۔۔۔۔۔
بقلم: حاوی شاہ
